రత్నాలశాస్త్రం ప్రకారం ప్రతిరోజూ నవగ్రహాలను అనుసరించి ఆభరణాలు ధరించడం ద్వారా శుభఫలితాలుంటాయని జ్యోతిష్య నిపుణులు అంటున్నారు.
ఇందులో భాగంగా స్త్రీలు బంగారంతో పొదిగించిన ఆభరణాలు లేకపోయినా.. తమ తమ స్థోమతకు తగినట్లు ఫ్యాన్సీగా ప్రస్తుత షాపుల్లో అమ్మబడే ఆభరణాలతో ప్రతిరోజూ అలంకరణ చేసుకోవడం మంచిదని రత్నాల శాస్త్ర నిపుణులు చెబుతున్నారు.
ఇక ఏ వారంలో ఎలాంటి ఆభరణాలు ధలించాలో చూద్దాం.. ఆదివారం సూర్యునికి (సూర్యగ్రహానికి ప్రీతికరమైన రోజు) కెంపుల చెవిపోగులు, హారాలు మొదలగునవి వాడటం మంచిది. దీనిద్వారా నేత్ర సంబంధిత రోగాలు, శరీర తేజస్సు, ప్రకాశవంతం పొందవచ్చును.
అలాగే సోమవారం చంద్రుని (చంద్రగ్రహం) కోసం ముత్యాల హారాలు, గాజులను వేసుకోవడం మంచిది. ముత్యాలతో తయారయ్యే గాజులను, చెవిపోగులను వాడటం ద్వారా మనశ్శాంతి, అనుకున్న కార్యములో విజయం చేకూరుతుందని జ్యోతిష్య నిపుణులు అంటున్నారు.
మంగళవారం కుజుని (కుజ గ్రహం) కోసం పగడాల దండలు, ఉంగరాలను వాడటం మంచిది. పగడాలతో తయారైన ఉంగరాలను, దండలను వాడటం ద్వారా కుటుంబసంక్షేమం చేకూరటం, ఈతిబాధలు తొలగిపోవడం వంటి ఫలితాలుంటాయి.
అదేవిధంగా.. బుధవారం (బుధుడు) బుధుని కోసం పచ్చల పతకాలు, గాజులు మొదలగునవి వాడటం శ్రేయస్కరం. విద్యాకారకుడైన బుధునికి ప్రీతికరమైన ఈ రోజుల విద్యార్థులు పచ్చని రంగుతో కూడిన ఉంగరాలు, స్త్రీలతే హారాలు వినియోగించడం మంచిది. దీంతో బుద్ధికుశలతలు పెరగడం, ధనలాభం, కార్యసిద్ధి చేకూరుతుంది.
గురువారం బృహస్పతి (గురుభగవానుడు) కోసం పుష్యరాగముతో తయారైన చెవిపోగులు, ఉంగరాలు మొదలగునవి వాడితే గురగ్రహ ప్రభావంతో అవివాహితులకు కళ్యాణం జరగడం, వ్యాపారాభివృద్ధి, కార్యసిద్ధివంటి ఫలితాలుంటాయి.
ఇకపోతే.. శుక్రవారం శుక్రుని (శుక్రగ్రహం) కోసం వజ్రాల హారాలు, ముక్కుపుడక వాడటం ద్వారా స్త్రీలకు సౌభాగ్యం, ఆర్థిక సమస్యలు తొలగిపోవడం, పదోన్నతులు, అనుకున్న కార్యాలు విజయవంతంగా పూర్తవుతాయి.
అలాగే.. శనివారం (శనిగ్రహం) శనికోసం నీలమణి, మణిహారాలు మొదలగునవి వాడటం మంచిది. దీనిద్వారా శనిగ్రహ ప్రభావంతో తలెత్తే సమస్యలు కొంతవరకు సమసిపోతాయి. నీలమణితో తయారైన హారాలు చెవిపోగులు, ఉంగరాలు ధరించడం ద్వారా ఈతిబాధలు తొలగిపోతాయని జ్యోతిష్య శాస్త్రం చెబుతోంది.
